Pane e fucazza

  1. RedVar
    RedVar Well-Known Member
    Registrato:
    13 Agosto 2009
    Messaggi:
    69
    Mi Piace Ricevuti:
    0
    Pane e Fucazza

    "Me ricordu...'na fiata...quannu ieu
    era vagnone quasi comu tie..."
    Quante vote li vecchi hannu cuntatu
    alli vagnoni de osci...crusitusi
    cose passate de li mani loru
    cu li fannu capire ca la vita
    nunn è cchiui scorpulusa comu ieri
    ma 'nu tappetu lisciu e vellutatu!
    "Me ricordu 'na fiata...me ricordu..."
    dice lu nonnu allu fiu de lu fiu
    "ca lu ranu mmaturu se mmetìa
    sutta 'nu sule ca siccava l'aria
    e ciunca l'ìa chiantatu e l'ìa crisciutu
    lu pane lu vardava a mmucca a l'otri.
    ...Pè iddhu e pè li fii...sulu fucazza
    ...stuppusa...nnudacusa e senza sale".
    "...E che cos'è la fucazza...nonno Pietro?"
    dumanna lu nnapute crusitusu
    allu vecchiu ca penza a quantu pane
    iancu e de ranu osci va minatu.
    "Eh!...la fucazza...Pierinu de lu nonnu
    era lu pane de li povareddhi
    fattu de orgiu...nnudacusu e nivuru
    mentre lu pane iancu e sapuritu
    era sulu pè ricchi e pè malati.
    Osci 'a fucazza se la mancia sulu
    ciunca face 'na cura dimagrante
    comu le caruseddhe e le signure
    ca tennu la bilancia pè cervellu.
    ...Ma me ricordu...'na fiata a casa mia
    lu pane iancu sparìa a quattru mazzate
    puru quann'era vecchiu e ccunculutu
    perchè dicivene ca cacci li denti de oru.
    ...Me ricordu a ddhi tiempi ca ogni vota
    ca me tuccava cu manciu ddha fucazza
    me nnudacava e poi chiancìa pe nn'una
    specie ci poi de costi me passava
    quarcunu cu 'nna feddha de ddhu pane
    iancu de luna e friscu de serenu.
    ...Osci...Pierinu lu pane iancu e friscu
    nu' se lu mancene mancu l'annimali...!
    ...Ma quannu visciu dhe fimmene de moi
    ca vannu ccattene pe tutta la famiia
    ddhu pane nivuru...bruttu e nudacusu
    ca pare 'na fucazza de 'na fiata...
    sentu lu core ca se strince an pettu
    e me vene cu cchianciu comu a tiempi.
    ...Ah!... me ricordu a ddhi tiempi...me ricordu...!"

    Peschi e Terrarussa di Giancarlo Colella

     

Condividi questa Pagina